صرخة طفل ( عتابا وزجل )

عدد المساهمات : 109 تاريخ التسجيل : 08/02/2009

العتابا من دمع عينك بَديها ( أبدأ بها )
وصدك للعدا شرع وبديهه ( شيء بديهي)
ع صوتك خدها لطمتْ بديها ( بيديها )
الحراير واعلنت ما في رجال

أنا اللي كنت في الميدان قدك ( بعمرك )
شعوري الغدر والخذلان قدك ( مزق قلبك )
انا بعرف جبل جرزيم قدك ( بحجمك ووزنك )
شموخك ما يطولو الاحتلال

ولكن سوسها هالخشب منو
علينا طحين او سردين منو
وعلى الشاشات غنو وا تمنو
نشيد الفتن نيخ لك جمال

يا أذناب االغرب أو ذنب فارس
علينا لو تمنو بنص فارس
توازن عسكري ما راد فارس ( فارس عودة )
قـَلِب فارس رجح عند النزال

يا خيّ الدم ويا نبض الخلايا
وعِـزة نفس ونخوة يعربيّة
يا أبناء الحلال ويا صبايا
ويا خيّي في الشتات ويا يا بيّّي
خطيت كثير وما انكرت الخطايا
عجب وقفت مراكبكم ع ديّي !!
صرخت اكثير وعانقت الشظايا
ما كانت من الم .. صرخة حميّة
عيوني بعينكم صوتي مطايا
ما كانت في العدا عيني ضحيّة
فضا الشاشات للقائد مرايا
وأنا الصورة براها بنبع ميّي !!
ولما شفت المصور معايا
صرخت مناشد الهمة العليّة
لحتى تثور هالنخوات فيكم
تعدو للقا وتعلو المطية

موضوع: شكرا يا شاعر الإثنين مايو 10, 2010 11:38 pm